Help A Girl Trying To Get Back Her Life

Assalamualaikum.

Main 27 saal ki hoon aur student hoon. Aaj bohat himmat karke apna ek personal masla share kar rahi hoon. Pichle kai saalon se ek qarz mere liye bohat bara bojh bana hua hai. Main sympathy nahi chahti, sirf apni situation share karna chahti hoon taake agar koi meri madad kar sakta hai to please kare.

2019 mein main practical life mein nayi nayi aayi thi aur khud kuch kamaane ke liye online earning schemes mein paise invest kiye. Us waqt mujhe itni samajh nahi thi ke kaun si schemes genuine hain. Mere apne paise doob gaye aur nuksan recover karne ki umeed mein maine doosron se bhi paise liye, jiski wajah se mere upar qarz barhta gaya.

Mujhe plants aur flowers ka bohat shauq tha. Majboori mein apne plants bech kar maine flower bulbs khareede aur unko grow karke sell karna shuru kiya. Dheere dheere mera chota sa flower/bulb business ban gaya. Main imported bulbs bhi mangwati thi aur sab kuch khud manage karti thi.

2020 mein maine ek supplier se taqreeban 200,000 rupees ka stock credit par liya. Mera plan tha ke bulbs grow karke sell karungi aur payment dheere dheere kar dungi. Lekin usi saal mujhe COVID ho gaya aur main bohat buri tarah bedridden ho gayi. Kuch mahine baad mera paon bhi fracture ho gaya. Main akeli thi aur plants ki care nahi kar saki. Dheere dheere sara stock kharab ho gaya aur business khatam ho gaya, lekin qarz mere sar par reh gaya.

Main ne ye baat apne ghar walon se bhi chhupa li kyun ke mujhe sharm aur darr tha ke wo mere baare mein kya sochenge. Allah mere supplier ko jazaye khair de, unhon ne mere saath bohat guzara kiya aur mujhe payment ke liye waqt diya.

2024 mein graduation ke baad mujhe 25,000 rupees ki job mili. Sirf 6 mahine baad wo job bhi khatam ho gayi. Phir bhi maine qarz se bhaagna nahi chhoda. Ab tak main apni income mein se thora thora karke 54,050 rupees wapas kar chuki hoon.

Ab meri job hai aur mujhe 50,000 rupees per month milte hain. Main ab bhi qarz ada kar rahi hoon, lekin petrol, transport aur zaroori kharchon ke baad bari amount dena mushkil hai.

Main maanta hoon ke mujhse ghalti hui thi. Main us waqt young aur inexperienced thi. Lekin maine apni ghalti ki zimmedari se kabhi bhaagne ki koshish nahi ki. Main jitna kar sakti thi, karti rahi hoon aur aaj bhi kar rahi hoon.

Isi liye aaj aap sab se madad ki request kar rahi hoon. Jo jitna aasani se de sakta hai, please meri madad kar dein. Choti amount bhi mere liye bohat bari madad hogi. Agar donate nahi kar sakte to please meri campaign share kar dein.

Meri request hai ke meri identity private rakhi jaye. Agar koi madad karna chahta hai to please admin ke through mujh tak pohanche. Aur meri majboori ka koi ghalat faida na uthaye. Mujhe sirf insaniyat ke nate madad chahiye.

Mera khwab hai ke qarz khatam hone ke baad main apna flower aur bulb business dobara shuru karun, is dafa zyada planning aur experience ke saath.

Main apni ghalti se bhaag nahi rahi. Main bas kai saalon se uthaye hue is bojh se nikalne ki koshish kar rahi hoon. Aapki choti si madad bhi mere liye bohat maayne rakhti hai.

Allah aap sab ko iska behtareen badla de aur aapke rizq mein barkat de. JazakAllah khair.